РАМАЗОН ҲАЙИТИНИНГ ФАЗИЛАТЛАРИ

Рамазон ҳайити дунё мусулмонлари томонидан кенг нишонланадиган, юксак умуминсоний қадриятлар, эзгу муносабатлар намоён бўлувчи байрамлардан бири ҳисобланади. Ушбу байрам Қуръони карим нозил бўлган, инсон ҳам маънавий, ҳам жисмоний нуқтаи назардан покланадиган Рамазон рўзасининг якунида нишонланади. Шу жиҳатдан Рамазон ҳайитида ҳар бир мўъмин-мусулмон ўз хурсандчилигини, меҳр-муҳаббатини, хайр-саховатини бошқаларга нисбатан кўпроқ намоён қилиши мақсадга мувофиқдир. Ушбу байрамда ҳар бир мусулмон киши яқинларини зиёрат қилиши, улар ҳолидан хабар олиши, етим-есирларга хайр-саховат улашиши ҳам хайрли амаллардан ҳисобланади. Ҳайит кунлари силаи раҳм қилиш, қариндош-уруғлар, дўст-биродарларни зиёрат қилиш ҳар қачонгидан ҳам аҳамиятлироқдир. Зеро, Абу Ҳурайра разияллоҳу анҳудан ривоят қилинган ҳадисда Пайғамбаримиз Муҳаммад саллаллоҳу алайҳи васаллам: “Кимни ризқи кенгайтирилиши ва ажали ортга сурилиши масрур этса, қариндошларига силаи раҳм қилсин”, деганлар. Ушбу муборак байрам муносабати билан нафақат қариндош-уруғлар ёки дўст-биродарлар, балки бева-бечоралар, етим-есирлар ҳолидан ҳам хабар олиш, уларга нисбатан марҳаматли бўлиш гўзал фазилатдан нишонадир. Бугунги кундаги давлатимиз сиёсатининг устувор йўналишларидан бири сифатида эътироф этилаётган оғир ижтимоий шароитга тушиб қолган оилаларни қўллаб-қувватлаш масаласи, айниқса мана шундай муборак ҳайит байрамларида яққол намоён бўлиб келмоқда. Жумладан, ижтимоий ҳимояга, алоҳида эътиборга муҳтож фуқаролар ҳолидан хабар олиш, уларга меҳр улашиш халқпарварлик тамойилининг амалдаги ифодаси сифатида намоён бўлиб келмоқда.

Ислом дўстликни рағбатлантирувчи, баҳамжиҳатлилик, кечиримлилик ғояларини ҳар томонлама қўллаб-қувватловчи диндир. Бу ғоялар Рамазон ҳайити кунларида ҳам намоён бўлади. Шу сабабдан ушбу қутлуғ байрамда ўзаро гина-кудуратни унутиш, Ҳайит баҳонаси билан дўстона муносабатларни тиклаш, ярашиш лозим. Зеро, гина-кудуратларга чек қўйиш, дўстлик муносабатларини мустаҳкамлаш ҳар бир фазилат соҳибининг гўзал хислатларидан ҳисобланади.

Ҳайит байрамларининг шундай фазилатларини тўғри англаган ҳолда, ушбу байрамларнинг муносиб тарзда нишонланишини таъминлаш, халқимизнинг ушбу қутлуғ айём кунларида муносиб ҳордиқ чиқаришини таъминлаш мақсадида дам олиш кунларининг оптималлаштирилиши ҳам муборак Рамазон ҳайитини муносиб тарзда нишонлаш борасида яратилаётган имкониятлардан биридир. 

Мана шундай имкониятлардан унумли фойдаланиш, минг йиллар давомида сақланиб келган гўзал одатлар асосида ҳайит байрамларини нишонлаш халқимизнинг маънавий ҳаёти янада тараққий этишига, меҳр-муҳаббатга асосланган алоқалар мустаҳкамланишига хизмат қилиши шубҳасиз.

Сарвар Саидов – Имом Термизий халқаро илмий-тадқиқот маркази илмий ходими