11-ФАСЛ. ДУНЁ ОЛИМЛАРИ БИЛАН ОХИРАТ ОЛИМЛАРИНИНГ ОРАСИНИ ТЕНГЛАШТИРИШ

11-фасл.

Олимлар ўртасидаги ғаразгўйликни ўйлаб кўрдим. Дунё муҳаббатидан бошланиши маълум бўлди. Чунки, охират олимлари меҳр-муҳаббатлик бўлишади, ҳасад қилишмайди. Аллоҳ азза жалла айтганидек, қалбларида бошқаларга берилган нарсага нисбатан ҳасад топишмайди.

Улардан кейин келганлар шундай дейишади: “Худоё, биз ва биздан олдин ўтган иймонли биродарларимизни кечиргин, қалбларимизда иймонлик кишиларга нисбатан кина-кудурат қолдирмагин”.

Абу Дардо (р.а) ҳақида шундай дейдилар: “Ҳар кеча кўп биродарлари ҳақига дуо қиларди”.

Имом Аҳмад Ҳанбал ўғли Имом Шофиъийнинг ўғилларига қараб қуйидагича дедилар: “Сенинг отанг мен ҳар эрталаб улар ҳақида дуо қиладиган олти кишининг биридир”.

Икки фирқа (уламолар)нинг орасини ажратадиган нарса шуки, дунё олимларини дунёнинг мансаби қизиқтиради, мол-дунё ва обрўни яхши кўришади. Охират олимлари эса бу нарсалардан йироқда бўлишади, булар дунёдан қўрқишар, дунёга мубтало бўлганларга раҳмлари келар эди.

Алқама айтадики: “Бўсаға ҳатлаб Алқама” дейишларини ёқтирмайман. Баъзи олимларнинг олдида тўрт кишидан зиёд одам ўтирса, туриб кетарди. Фатводан сақланишар, шуҳратни ёқтиришмас.

Қавм уфуриб турган денгизга ўхшайди, унга тушган киши қутилиши маҳол. Бир-бирларини дуо қилишларигина мумкин.

Арабчадан Аббосхон Абдуллаев таржимаси.