Ta’lim muassasasi talabalari o’rtasida “Qadr kechasi – Qur’on nozil bo’lgan kecha” mavzusida Qur’on musobaqasi o’tkazildi.

2021-2022 o’quv yilining aprel oyi “Qur’on qiroati va tajvid” fani oyligi munosabati bilan, Imom Termiziy o’rta maxsus islom ta’lim muassasasi talabalari o’rtasida joriy yilning 22 aprel kuni “Qadr kechasi – Qur’on nozil bo’lgan kecha” mavzusida Qur’on musobaqasi o’tkazildi.

Hifz hamda mujavvid yo’nalishida bo’lib o’tgan ushbu musobaqada ta’lim muassasi pedagoglari va talabalari, Imom Termiziy XITM xodimlari, viloyatimizdagi taniqli qorilar, imom-xatiblar hamda bir qator Qur’on muxlis hamda muxlisalari ishtirok etishdi.

Musobaqa avvalida “Hakim Termiziy” jome’ masjidi muazzini Bohodirqori Pardayev tomonidan go’zal Qur’on tilovat qilindi. Bellashuvni esa, ta’lim muassasasi direktori Shukurillo Umarov ochib berib, Qur’oni Karimning fazli haqida so’zlab, barcha ishtirokchilarga muvaffaqiyat tiladi.

 “Qur’on qoroati va tajvid” o’quv kursining ustozlaridan iborat hakamlar hay’ati  raisi Abbos Qosimov tomonidan musobaqa shartlari tushuntirib berilar ekan, jumladan:

1. Qur’oni Karimdan xohlagan oyatni tilovat qilish;

2. Qur’oni Karimga qarab biletga ko’rsatilgan oyatlarni tajvid asosida tilovat qilish;

3. Qur’ondan bitta oyat ko’rsatilib, ushbu oyatda mavjud tajvid qoidalari haqida so’zlab berish lozimligini ta’kidlab o’tdi.

Ko’tarinki ruhda bo’lib o’tgan ushbu bellashuvda 19 nafar talaba ishtirok etib, qur’a tashlash natijasiga ko’ra o’z chiqishlarini namoyon qildilar.

Ishtirokchilarning chiqishlari hakamlar tomonidan munosib baholanar ekan, Hifz yo’nalishida Abdullayev Fathullo, Mujavvid yo’nalishida esa 1 – o’ringa Abdulhakimov Islomiddin, 2 – o’ringa Abdug’aniyev Abdulaziz, 3 – o’ringa Ziyavidinov Abdusamad munosib deb topildi va ta’lim muassasasi tomonidan diplom hamda qimmatbaho sovg’alar bilan taqdirlanishdi.