Имом Термизий ўрта махсус ислом таълим муассасасида талабаларнинг ота-оналари билан учрашув бўлиб ўтди.

Имом Термизий ўрта махсус ислом таълим муассасасининг режасига асосан 2021-2022 ўқув йили якунланиши арафасида талабаларнинг хулқ-атвори, ўзлаштириш даражаси ва бошқа муҳим масалаларга қаратилган учрашув уларнинг ота-оналари иштирокида ўтказиш белгиланган. Айни мақсадга қаратилган тадбир бугун бўлиб ўтди. Унда талабаларнинг илмий салоҳияти, ўзлаштириш кўрсаткичлари, уларга яратилган қулай шароитлар ҳақида батафсил маълумотлар берилиб, икки томонлама фикрлар алмашилди.

Имом Термизий ўрта махсус ислом таълим муассасаси директори Шукурилло Умаров иштирокчиларга мадраса фаолияти ва талабалар учун яратилган шароитлар ҳақида тўхталар экан, ушбу таълим даргоҳида таҳсил олаётган ҳар бир талаба эътибордан четда эмаслиги, бепул озиқ-овқат, барча шароитларга эга ётоқхона, қўлёзма ва янги нашрлардан иборат йирик ҳажмли фондга эга кутубхона доимо талабалар хизматидалиги, буларнинг барчаси мамлакатимизда ёшлар учун яраилаётган имкониятларнинг маҳсули эканлигини таъкидлаб ўтди.

Маълумот ўрнида айтиш мумкинки, талабаларга яратилган қулайликлар пировардида, “Вақф” хайрия жамоат фонди кўмаги билан ота-онаси ижтимоий ҳимояга муҳтож, кам таъминланган талабаларнинг тўлов шартнома пуллари тўлаб берилди. Шунингдек, рамазон ойида ҳар куни ифторлик ва саҳарлик дастурхонлари ёзилиб, талабаларнинг яшаш шароитлари доимо раҳбарият диққат марказида бўлди.

Учрашув давомида иштирокчилар фарзандлари учун ушбу муассасада яратилган қулайликлар ва имкониятлардан жуда мамнун эканликларини билдиришар экан, талабаларнинг етук мутахассис бўлиб етишишлари, уларнинг оила даврасидаги вақтини ҳам мазмунли ўтказиш, одоб-ахлоқ қоидаларига риоя қилишлари борасида таълим муассасаси билан доимо ҳамкорликка тайёр эканликларини таъкидлашди.

Самимий ва дўстона кечган учрашув давомида фаол ва иқтидорли талабаларнинг ота-оналарига Имом Термизий ўрта махсус ислом таълим муассасаси раҳбариятининг ташаккурномала ҳамда эсдалик совғалари топширилди.

Имом Термизий халқаро илмий-тадқиқот маркази Матбуот хизмати.